【轉載】日本留學記之美齡姐姐的大棉胎

最后的乐园 · 發表於 2014-8-30 16:55

上回講到，小女去日本留學，初到貴境時，言語不通，非常沮喪，又求助無門，終於哭了出來！結果打電話回家報平安之餘，更找家父求救！爸爸聽到女兒的哭聲後心如刀割：「你聽朝即刻去搵陳美齡接濟你啦！」

於是翌日，小女拿着陳美齡的電話號碼，先撥一通電話給她：「美齡姐姐呀？我係杜Sir個女，杜如風呀！」「你點呀？尋晚你Daddy講晒你嘅情況畀我聽啦！唔使驚嘅，初初嚟到日本係會未習慣聽佢哋講嘢o架啦！你o依家即刻嚟我屋企先啦！」然後她把地址給了我，我便馬上搭火車去到她當時住在惠比的大屋！大家都應該知道日本的地址最難找！甚麼甚麼「2-5-7」，嘩！看完地圖都唔識搵！先是2丁目（區域號）、5是街號、7是屋號，單是找這幾個numbers，已經夠我找了一個多小時，終於走到去美齡姐姐的家門前：「嘩！住喺高尚住宅區，間屋仲要咁大間！佢應該救到我啦！」

係，我去日本讀書時張棉胎，都係陳美齡送嘅！

叮噹！這位又美麗又有高貴氣質的女主人親自走出來給我一個大擁抱！「嘩！咁大個女嘞！仲咁靚女添！（呢句絕對係禮貌上的句子！）你細細個時我已經見過你o架啦！杜Sir好嗎？」「老竇好好！有心！」（我都話咗我老竇成日畀人問候o架啦！）「入嚟先講啦！」接着，非常十級奇怪的事情出現了！間屋有車立架！！嘩！仲要係用透明玻璃造的！小女實在按捺不住：「嘩！你間屋好犀利呀！有『車立』嘅！」美齡姐姐客氣地笑笑：「係呀，因為有六層，所以加部『車立』方便啲囉！」六層？？！！她帶我入車立去到客廳/偏廳那一層，（都唔知佢間屋有幾多個廳？！）然後開始傾談起來……

好，入正題了！小女向她解釋了我的宿舍內空無一物的「監倉」狀況，由於當時還未開學，我真的人生路不熟，語言又不通，愈說愈可憐，她就愈聽愈同情，拖着我手聽我訴苦……然後美齡姐姐突然攞出兩個最大size的紅白藍膠袋，開始左執右拾，還上車立落車立，找來很多很多東西給我，基本上柴米油鹽醬醋茶都齊了，還有一大盒一大盒的鐵盒餅乾，記得是Yokumoku，日本最名貴的糕餅牌子……仲唔只，開始出砂煲瓦了！最後……登登登登……一張大棉被！「嘩！攞你命三千！」她非常用心地幫我想出我需要用的急需品，然後再非常細心地替小女將所有「打仗」或「走難」用品一股腦兒塞給我，我呆了一呆，完全說不出話來！心內既感激又有一點受不起的難為情，善解人意的美齡姐姐也不用我多說話，隨即安排我返回宿舍！重重的兩大袋日用品和愛心食物，陪伴我走過了在異鄉學習的日子，開拓了我人生的另一頁……

後來的變化，更加戲劇性、更加峰迴路轉，簡直呀……唔追看落去唔得呀！！欲知詳情，下星期再見！！！

http://eastweek.my-magazine.me/index.php?aid=36048